Zeynəb Məmmədyarova: “Düşünürəm ki, ilk “beşliy”ə düşə bilərik”

638

42-ci Ümumdünya Şahmat Olimpiadasının dördüncü günündə qadınlardan ibarət əsas yığmamızın üzvü Zeynəb Məmmədyarova Rumıniya ilə görüşdə birinci lövhədə Korina-İzabela Peptanı məğlub edib.
Olimpiadada ardıcıl ikinci, ümumilikdə üçüncü qələbəsini qazanan Zeynəb Məmmədyarovanın iştirakı ilə mətbuat konfransı keçirilib.
Bakı Şahmat Olimpiadasının mətbuat xidməti xəbər verir ki, xanım şahmatçımız əvvəlcə qələbəsini şərh edib: “Dünən və bu gün qarşılaşdığım rəqiblərim çox yüksək səviyyəli şahmatçılar idi. Həm Polşa, həm də Rumıniya güclü komandadır. Kapitanımız mənə ehtiyatlı, mümkün qədər risksiz oynamağı tapşırmışdı. Hər iki komanda ilə görüşlərdə heç-heçə bizi qane edirdi. Ehtiyatlı oynasam da, qələbə qazandım. Çox şadam ki, bu qələbə yığmamız üçün mühüm əhəmiyyət kəsb edir. Komanda üçün yarım xal da vacibdir. Meksika ilə görüşdə rəqibim reytinqdə məndən zəif idi. Oyun heç-heçəyə doğru getsə də, risk etdim və uduzum. Həmin yarım xal sonda özünü göstərəcək”.
Xanım qrossmeysterimiz atası Həmid Məmmədyarovun qazandığı uğurlarda böyük rol oynadığını bildirib: “Əksər yarışlarda atam bizimlə olur. Olimpiadada da öz dəstəyini bizdən əsirgəmir. Hər gün oyundan qabaq öz tapşırıqlarını verir. Onun varlığı bizə uğur gətirir”.
Məmmədyarova son 1 ildə çox az turnirdə yarışdığını bildirib: “Siyasi fəaliyyətimlə əlaqədar olaraq son 1 ildə yarışlara az qatılıram. Amma vətənpərvərliyimiz özünü göstərir və bu olimpiadada çıxışımız uğurlu alınır. İnanıram ki, sona qədər yaxşı mübarizə aparmağa enerjimiz çatacaq. Qadın şahmatçılarımız əksər hallarda reytinqlərindən daha yaxşı çıxış edirlər. Bu dəfə də elə olacağına inanıram. Düşünürəm ki, ilk “beşliy”ə düşə bilərik”.
Tanınmış qrossmeyster Vətəndə keçirilən yarışlarda məsuliyyətin çox olduğunu vurğulayıb: “2002-ci ildə Bakıda gənclər arasında Avropa çempionatının qalibi oldum. 2003-cü ildə Naxçıvanda dünya çempionatında bürünc medal qazandım, qardaşım Şəhriyar isə çempion oldu. Vətəndə oynamaq bir qədər psixoloji cəhətdən çətindir. Çünki doğma divarlar əlavə məsuliyyətdir. Amma bu məsuliyyət öz işini görür və bizə müvəffəqiyyət gətirir”.

Qeyd edək ki, Bakıda keçirilən 42-ci Ümumdünya Şahmat Olimpiadasında IV turun görüşləri keçirilib.

4 turdan sonra kişilərdən ibarət milli komandamız 8 xalla ikinci pillədə qərarlaşıb. Lider Çin yığmasıdır. İkinci komandamız 6 xalla 27-cidir. 4 xala sahib üçüncü yığmamız isə 71-ci yeri tutur.

Qadınlardan ibarət əsas millimiz 7 xalla 11-cidir. İkinci komandamız 5 xalla 34-cü, eyni xala malik üçüncü millimiz isə 39-cu yeri tutur.