Qurban Qurbanov: “Əslində, bunu gözləyirdik”

0
401

Sentyabrın 7-də futbol üzrə Azərbaycan milli komandası UEFA Millətlər Liqasının qrup mərhələsi çərçivəsində Kosovo yığması ilə qarşılaşıb.

Bakı Olimpiya Stadionunda keçirilmiş oyunda Azərbaycan yığmasının start heyətində Kamran Ağayev, Qara Qarayev, Pavel Paşayev, Maksim Medvedev, Mahir Mədətov, Urfan Abbasov, Emin Mahmudov, Ruslan Qurbanov, Riçard Almeyda, Ramil Şeydayev, Bədəvi Hüseynov yer alıblar.

Kosovo millisinin ilk onbirliyində isə meydana Samir Aykani, Fidan Aliti, Xerolind Şala, Xekuran Kriyeziu, Bersant Celina, Arber Zeneli, Amir Raxmani, Merqrim Voyvoda, Vedat Murici, Leart Pacarada və Edon Jeqrova çıxıblar.

Qarşılaşmanı Norveçdən olan hakimlər briqadası idarə edib. Oyunun baş hakimi Ola Hobber Nilsen olub. Ona Harald Qronevik, Oskar İsaksen və Simon İtterland kömək ediblər. Espen Andreas Eskas və Tom Harald Haqen əlavə köməkçi hakim funksiyasını yerinə yetiriblər.

İlk dəqiqələrdən irəli atılan Azərbaycan milli komandası rəqibin qapısı qarşısında bir neçə təhlükəli vəziyyət yaradıb. Buna baxmayaraq, birinci hissə qolsuz heç-heçə ilə başa çatıb.

Fasilədən sonra daha üstün oyun nümayiş etdirən Azərbaycan milli komandası hücumlarının sayını artırıb. Lakin bu fəallıq da heç bir nəticə verməyib və görüşdə hesab açılmayıb – 0:0.

Qeyd edək ki, “D” liqasının üçüncü qrupunda qərarlaşan Azərbaycan millisi növbəti oyununu sentyabrın 10-da səfərdə Malta yığması ilə keçirəcək.

Azərbaycan milli komandasının baş məşqçisi Qurban Qurbanov UEFA Millətlər Liqasının birinci turunda Kosovo milisinə qarşı keçirilən oyundan sonra keçirilən mətbuat konfransında deyib ki, ağır oyun oldu: “Əslində, bunu gözləyirdik. Rəqibin fərdi oyun keyfiyyətləri ilə seçilən futbolçuları vardı. Birinci hissə çətin oldu. Hər iki komandanın ehtiyatlı oynadığı hiss olunurdu. Ancaq ikinci hissə fərqli keçdi və futbolçularımız daha məsuliyyətli idilər. Oyunun nizam-intizamından razı qaldım”.

Baş məşqçi, həmçinin komandanın daxilindəki müəyyən problemlərdən də danışıb:  “Heyətlə bağlı səhv etdiyimi düşünmürəm. Hazır olan futbolçulara şans verdim. Bəzi problemlər var ki, onları aradan qaldırmalıyıq. Xüsusilə də futbolçular oyun təcrübəsini artırmalı, daha yaxşı çempionatlarda çıxış etməlidirlər. Üç gündən sonra bizi səfərdə növbəti oyun gözləyir. Həmin qarşılaşmaya hazır olmaq üçün maksimum çalışmalıyıq”.