Qızılın bahalaşması Neft Fonduna 78,1 milyon manat gəlir gətirib

477
Dövlət Neft Fondu 2014-cü ilin ilk altı ayı ərzində gəlir və xərclərinə dair məlumatı açıqlayıb. 
Fonddan verilən məlumatda bildirilir ki, 2014-cü ilin yanvar-iyun ayları ərzində Neft Fondunun büdcə gəlirləri 6 milyard 493,6 milyon manat, büdcə xərcləri isə 5 milyard 163,1 milyon manat təşkil edib. 2014-cü ilin ilk 6 ayı ərzində Dövlət Neft Fondunun neft və qaz sazişlərinin həyata keçirilməsi ilə bağlı gəlirləri 6 milyard 374,8 milyon manat, o cümlədən mənfəət neftinin və qazın satışından 6 milyard 355,4 milyon manat, tranzit gəlirləri 4,4 milyon manat, bonus ödənişləri 13,3 milyon manat, akrhesabı ödənişlər 1,7 milyon manat təşkil edib.

2014-cü ilin yanvar-iyun tarixləri ərzində Neft Fondunun vəsaitlərinin idarə olunmasından əldə olunan gəlirlər 118,8 milyon manat olub.

Hesabat dövrü ərzində Neft Fondunun 2014-cü il büdcəsinin icrası çərçivəsində 4 milyard 883,8 milyon manat vəsait dövlət büdcəsinə transfert edilib. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 177,3 milyon manat, Samur-Abşeron suvarma sisteminin yenidən qurulmasına 11 milyon manat, “Bakı-Tbilisi-Qars” yeni dəmir yolu layihəsinin maliyyələşdirilməsinə 19,6 milyon manat vəsait ayrılıb. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın maliyyələşdirilməsinə 5,2 milyon manat vəsait yönəldilib. “Şahdəniz” qaz-kondensat yatağının istismarının ikinci mərhələsi, Cənubi Qafqaz Boru Kəmərinin genişləndirilməsi, TANAP və TAP layihələri üzrə yaradılmış səhmdar cəmiyyətin birbaşa dövlət mülkiyyətində olan səhmlərinin maliyyələşdirilməsi məqsədilə Neft Fondundan 40 milyon manat vəsait ayrılıb. 2014-cü ilin yanvar-iyun ayları ərzində Neft Fondunun idarə edilməsi ilə bağlı xərcləri 26,2 milyon manat təşkil edib. Cari ilin ilk altı ayı ərzində valyuta məzənnələrinin dəyişməsindən yaranan fərq üzrə fondun büdcədənkənar gəlirləri 6,5 milyon manat təşkil edib, o cümlədən qızılın qiymətinin dəyişməsindən yaranan fərq üzrə fondun büdcədənkənar gəlirləri 78,1 milyon manat, ABŞ dolları, Avro, İngilis funt sterlinqi və digər valyutaların dəyişməsindən yaranan fərq üzrə Fondun büdcədənkənar xərcləri 71,6 milyon manat təşkil edib.

2014-cü il iyulun 1-nə fondun aktivləri 2014-cü ilin əvvəlinə (35 milyard 877,5 milyon dollar) nisbətən 4,86% artaraq 37 milyard 622,4 milyon dollara bərabər olub. 2012-ci ildən etibarən Neft Fondu tərəfindən qızılın alınmasına başlanılıb və 1 iyul 2014-cü il tarixinə fond tərəfindən alınan qızılın miqdarı 30 min 175 kq (970 min 146 troya unsiyası) təşkil edib.