Qızıl yenidən sürətlə ucuzlaşmağa başlayıb

399
Dünən qızılın qiyməti cari ilin əvvəlindəki səviyyəyə düşüb. 
Mərkəzi Bankın açıqladığı məlumatda bildirilir ki, dünən bir unsiya (31 qram) qızılın qiyməti 967,94 manat (1 qram-31,2 manat) təşkil edib. Bu, 10 yanvar 2014-cü il tarixindən sonra qeydə alınan ən aşağı göstərici hesab olunur. Həmin tarixdə tarixində qızılın bir unsiyası 961,6 manata ( 1 qram-31,1 manat) bərabər olub. Son bir gün ərzində qızılın qiyməti 1,2% aşağı düşüb. Sentyabr ayının 11-də 1 unsiya qızılın qiyməti  979,27 manat olduğu halda dünən – sentyabr ayının 12-də 967,94 manata düşüb. Ümumiyyətlə sentyabr ayının əvvəlindən ötən 12 gün ərzində qızılın qiyməti 4% ucuzlaşıb. Məlumat üçün bildirək ki, qızılın qiymətində müşahidə edilən son 12 illik dəyişikliklərə nəzər saldığımız zaman belə görünür ki, qızıl 2012-ci ilə kimi heç vaxt ucuzlaşmayıb. 2002-ci ilin dekabr ayından 2011-ci ilin sonuna kimi qızılın qiyməti 5 dəfədən çox artıb. Qiymət artımı ən çox 2009-cu ildə qeydə alınıb – 51,9%. Belə ki, 2008-ci ilin dekabr ayının ilk günlərində qramı 25,6 dollardan satılan qızıl bir il sonra 38,5 dollara satılıb. Ən aşağı qiymət artımı isə 2008-ci ildə müşahidə olunub. Belə ki, 2008-ci il ərzində qızılın qiyməti cəmi 1,6% bahalanıb. Ancaq 2012-ci ilin əvvəlindən başlayaraq qızılın qiyməti aşağı düşüb və nəticədə il ərzində qızıl 5,1% ucuzlaşıb. Ancaq qızılın qiymət ötən il daha kəskin şəkildə aşağı düşməyə başlayıb. Qızıl 2013-cü il ərzində 18,3% ucuzlaşıb. Məlumat üçün onu da qeyd edək ki, ötən ilin aprel ayının 16-da, cəmi bir gün ərzində qızıl 9,1% ucuzlaşıb. 15 aprel tarixində qızılın 1 unsiyası 1204,9 manata ( 1 qram-38,8 manat) bərabər olduyğu halda, aprelin 16-da 1 unsiya qızılın qiyməti 1094,6 manatdək (1 qram 35,3 manat) aşağı düşüb.