“Prezidentin bu fərmanı inqilabı addımdır”

593

“Cənab prezidentin bu fərmanı sahibkarlığın inkişafı istiqamətində inqilabı addımdır. Biz uzun müddətdir ki, belə bir qərarı gözləyirdik”.

lent.az-ın məlumatına görə, bu sözləri Milli Məclisin iqtisadi-siyasət komitəsinin üzvü, deputat Vahid Əhmədov prezident İlham Əliyevin bu gün imzaladığı fərmanı şərh edərkən deyib.

V.Əhmədovun sözlərinə görə, ölkədə sahibkarlara lisenziya verilməsi hüququnun “ASAN” Xidmətə həvalə olunması özlüyündü çox müsbət haldır: “Bu qurum özünü kifayət qədər doğruldub. Bu günə qədər ASAN Xidmətə həvalə olunan bütün sənədləşdirmə işləri yüksək şəffaflıqla icra olunub. Burada heç bir korrupsiya əlamətləri yoxdur. Ona görə də lisenziya xidmətinin də “ASAN”a verilməsi sahibkarlığın inkişafına müsbət təsir göstərəcək”.

Deputat bildirib ki, dünyada neftin qiyməti kəskin aşağı düşüb, dövlət büdcəsində azalmalar var və bunun üçün də ölkə başçısı qeyri-neft sektorunun inkişafına diqqəti artırır: “Cənab prezident bu sahədə həmişə məmurları tənqid edib, deyib ki, sahibkarlara maneələr törətməyin, imkan verin, bu sahə inkişaf etsin. Ancaq təəssüf ki, bəzi məmurlar buna getmirdilər, kiçik və orta sahibkarlığın inkişafına əngəl olurdular”.

V.Əhmədovun sözlərinə görə, bu, prezident İlham Əliyevin kiçik və orta sahibkarlığın inkişafı üçün apardığı strateji siyasətdir: “Bu fərmanın əsas cəhəti odur ki, bundan sonra məmurla sahibkar arasında heç bir rüşvətxorluq, süründürməçilik, korrupsiya olmayacaq. Sahibkar gəlib öz sənədlərini verib, lisenziyasını alıb, rahat şəkildə işləyəcək. Bu da öz növbəsində yeni iş yerlərinin açılmasına, dövlət büdcəsinə əlavə vəsaitlərin cəlb edilməsinə öz müsbət təsirini göstərəcək”.
Sahibkarlıq fəaliyyətinin xüsusi razılıq (lisenziya) tələb olunan növlərinin sayının azaldılması, xüsusi razılıq (lisenziya) verilməsi prosedurlarının sadələşdirilməsi və şəffaflığının təmin edilməsi haqqında
Azərbaycan Respublikası Prezidentinin Fərmanı

Sahibkarlıq fəaliyyətinin inkişafı Azərbaycan Respublikasında dövlət siyasətinin prioritet istiqamətlərindəndir.

Lakin sahibkarlıq fəaliyyətinin xüsusi razılıq (lisenziya) tələb olunan növlərinin sayının çoxluğu, xüsusi razılıq (lisenziya) verilməsinin mövcud prosedurları sahibkarlığın inkişafına əlavə çətinliklər və korrupsiya hallarına şərait yaratmışdır.

Azərbaycan Respublikası ərazisində sahibkarlığın inkişafının stimullaşdırılması, əlverişli biznes mühitinin təmin edilməsi, xüsusi razılıq (lisenziya) verilməsi prosedurlarının sadələşdirilməsi və şəffaflığının təmin edilməsi məqsədi ilə, Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

1. Sahibkarlıq fəaliyyətinin xüsusi razılıq (lisenziya) tələb olunan bütün növləri üzrə (dövlət təhlükəsizliyindən irəli gələn hallar istisna olmaqla) xüsusi razılıq (lisenziya) verilməsi Azərbaycan Respublikasının İqtisadiyyat və Sənaye Nazirliyinə həvalə edilsin.

2. Bu Fərmanın 1-ci hissəsində nəzərdə tutulmuş xüsusi razılıq (lisenziya) verilməsinin aşağıdakı qaydalara uyğun həyata keçirilməsi təmin edilsin:

2.1. sahibkarlıq fəaliyyəti növünün xüsusiyyətlərindən asılı olaraq Azərbaycan Respublikasının İqtisadiyyat və Sənaye Nazirliyi tərəfindən zəruri hesab edildikdə xüsusi razılıq (lisenziya) verilməsi ilə əlaqədar aidiyyəti dövlət orqanlarının rəyinin alınması;

2.2. müəyyən edilmiş müddətdə aidiyyəti dövlət orqanı tərəfindən rəy bildirilmədikdə müsbət rəyin verilmiş hesab edilməsi;

2.3. Azərbaycan Respublikasının İqtisadiyyat və Sənaye Nazirliyi tərəfindən xüsusi razılıq (lisenziya) verilməsi xidmətinin “ASAN xidmət” mərkəzlərində həyata keçirilməsi.

3. Azərbaycan Respublikasının İqtisadiyyat və Sənaye Nazirliyi:

3.1. aşağıdakı məsələlərə dair təkliflərini bir ay müddətində Azərbaycan Respublikasının Prezidentinə təqdim etsin:

3.1.1. xüsusi razılıq (lisenziya) tələb olunan fəaliyyət növlərinin sayının minimuma endirilməsi;

3.1.2. dövlət təhlükəsizliyindən irəli gələn hallarla əlaqədar xüsusi razılıq (lisenziya) tələb olunan fəaliyyət növlərinin siyahısının müəyyən edilməsi;

3.1.3. bu Fərmanın müddəaları nəzərə alınmaqla sahibkarlıq fəaliyyətinin həyata keçirilməsi üçün tələb olunan xüsusi razılıq (lisenziya) verilməsi qaydasının sadələşdirilməsi və şəffaflığının təmin edilməsi məqsədi ilə təkmilləşdirilməsi.

3.2. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə sahibkarlıq fəaliyyətinin həyata keçirilməsi üçün tələb olunan xüsusi razılıq (lisenziya), sertifikat, şəhadətnamə və digər sənədlərin elektron qaydada verilməsini təmin edən “Elektron lisenziya” portalının yaradılması istiqamətində işləri sürətləndirsin.

4. “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında” Azərbaycan Respublikası Prezidentinin 2012-ci il 5 sentyabr tarixli 706 nömrəli Fərmanında (Azərbaycan Respublikasının Qanunvericilik Toplusu, 2012, № 9, maddə 858; 2013, № 2, maddə 109, № 3, maddə 254, № 4, maddə 377; 2014, №2, maddə 117, №7, maddə 486, №9, maddə 1044; 2015, №6, maddə 708, №8, maddə 917) aşağıdakı dəyişikliklər edilsin:

4.1. 5.17-ci bəndin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 5.18-ci bənd əlavə edilsin:

“5.18. sahibkarlıq fəaliyyətinin həyata keçirilməsi üçün tələb olunan (dövlət təhlükəsizliyindən irəli gələn hallar istisna olmaqla) xüsusi razılıq (lisenziya) verilməsi.”;

4.2. 6-cı hissədə “Nəqliyyat Nazirliyinə,” sözlərindən sonra “İqtisadiyyat və Sənaye Nazirliyinə,” sözləri əlavə edilsin.

5. Azərbaycan Respublikasının Milli Məclisinə təqdim edilmiş “Lisenziyalar və icazələr haqqında” Azərbaycan Respublikasının qanun layihəsinə baxılmasının sürətləndirilməsi tövsiyə edilsin.

İlham Əliyev

Azərbaycan Respublikasının Prezidenti

Bakı şəhəri, 19 oktyabr 2015-ci il.