Gənc müəllimə: “MDU ölkəmizin ən qabaqcıl ali təhsil müəssisələrindən birinə çevriləcək”

154

Xocavənd rayonunun Qaradağlı kəndində anadan olan Şəlalə Quliyeva erməni işğalı səbəbindən bir yaşından köçkün həyatı yaşamağa məcbur olub və ailəsi ilə birlikdə Mingəçevir şəhərində məskunlaşıb. Vətən həsrəti, çətin keçən uşaqlıq illəri onun ölkəmiz üçün layiqli vətəndaş, cəmiyyətimiz üçün faydalı mütəxəssis olmaq istəyinə mane ola bilməyib.

2008-ci ildə Mingəçevir şəhər Təbiət-Riyaziyyat və Humanitar Elmlər təmayüllü litseyi bitirən Ş. Quliyeva ali təhsil müəssisələrinin bakalavriat səviyyəsinə tələbə qəbulu imtahanlarında 690 bal toplayaraq rekord göstərici ilə Bakı Dövlət Universitetinin (BDU) Beynəlxalq münasibətlər ixtisasına qəbul olub. BDU-da ali təhsilini yüksək göstəricilərlə başa vuran Ş. Quliyeva daha sonra Bakı Slavyan Universitetində “Ölkəşünaslıq” ixtisası üzrə magistr dərəcəsi alıb.

Əmək karyerasına 2019-cu ildə Mingəçevir Dövlət Universitetində (MDU) başlayan Ş. Quliyeva hazırda  bu təhsil ocağının Humanitar fənlər kafedrasında müəllim vəzifəsində çalışır. “Politologiya” və “Multikulturalizmə giriş” fənlərini tədris edən Ş. Quliyeva MDU ailəsinin üzvü olmaqdan çox məmnundur və təhsilini doktorantura səviyyəsində davam etdirmək fikrindədir.

MDU-nun İctimaiyyətlə əlaqələr şöbəsinin əməkdaşı ilə söhbət zamanı o, müzəffər Ali Baş Komandanımızın və rəşadətli Azərbaycan Ordusunun xalqımıza qazandırdığı şanlı Qələbənin sonsuz sevincini yaşadığını və buna görə böyük qürur hissi keçirdiyini söylədi. Doğma yurduna qayıdacağını səbrsizliklə gözləyən Ş.Quliyeva tarixi qələbənin yaratdığı ruh yüksəkliyinin onun fərdi və karyera inkişafında böyük rol oynayacağını bildirdi.

Son dövrdə MDU-da bütün fəaliyyət istiqamətləri üzrə həyata keçirilən keyfiyyət dəyişikliklərindən, universitetin yeniləşən və müasirləşən simasından bəhs edən Ş.Quliyeva yeni dövrün tələblərinə uyğun universitet quruculuğunda fəal iştirak etməyə çalışdığını dedi. O, həmçinin MDU-nun yaxın gələcəkdə ölkəmizin ən qabaqcıl ali təhsil müəssisələrindən birinə çevriləcəyini də əminliklə vurğuladı.

Ölkəmizdə ali təhsilin inkişafına göstərilən yüksək dövlət qayğısının əhəmiyyətini vurğulayan Ş.Quliyeva MDU-nun gələcək uğurlarında pay sahibi olmaq, layiqli vətəndaş və yüksək ixtisaslı mütəxəssis yetişdirilməsinə töhfə vermək üçün bundan sonra daha çox çalışacağını diqqətə çatdırdı.

Qeyd edək ki, hazırda MDU-da ictimai fəallığı, yaradıcılıq qabiliyyəti və vətənpərvərlik keyfiyyətləri ilə fərqlənən gənclərə üstünlük verilir.

Esmira Hidayətova, Mingəçevir