“Azərbaycan Avrasiya İttifaqına qoşulmaq niyyətində deyil”

0
308
Azərbaycan Avrasiya İttifaqına və ya hər hansı digər bir təşkilata üzv olmaq niyyətində olmadığını növbəti dəfə bəyan edib.
Rusiya, Belarus və Qazaxıstan arasında ötən ayın 29-da Astanada Avrasiya İttifaqının yaradılması ilə bağlı imzalanan anlaşmadan sonra MDB məkanındakı digər dövlətlərin də bu quruma qoşula bilməsi  barədə ara-sıra müxtəlif fikirlər səsləndirilməkdə, çağırışlar edilməkdədir. Bununla bağlı məsələyə münasibət bildirən Azərbaycan Prezidenti Administrasiyası rəhbərinin müavini, PA-nın Beynəlxalq əlaqələr şöbəsinin müdiri Novruz Məmmədov jurnalistlərə açıqlamasında deyib ki, ölkəmiz bu barədə düşünmür. Novruz Məmmədov: “Azərbaycanın, hələlik, Avrasiya İttifaqına qoşulmaq niyyəti yoxdur”,- deyib.PA rəsmisi Ermənistanın Avrasiya İttifaqına qoşulmasına da münasibət bildirib. O deyib ki, Ermənistanın hansısa quruma üzv olması Azərbaycanı narahat etmir: “Bununla bağlı narahatlığımız üçün heç bir əsas yoxdur. Azərbaycan Prezidenti İlham Əliyev bununla bağlı mövqeyini bildirib. Bu mövqe Qazaxıstan Prezidenti Nursultan Nazarbayev tərəfindən həmin iclasda ortaya qoyulub. Ermənistan da o tələblərə uyğun olaraq, hansı quruma üzv olur olsun, özünün suveren hüququdur”.

Novruz Məmmədov həmçinin qeyd edib ki, Ermənistan  BMT-yə, Ümumdünya Ticarət Təşkilatına üzv olduğu şərtlərlə istənilən təşkilata qoşula bilər: “Başqa söhbət ola bilməz! Bu, bizim tələbimizdir və o da yerinə yetiriləcək”.

BIR CAVAB BURAXIN

Please enter your comment!
Please enter your name here