DOSTdan məmnunluq səviyyəsi 93 faizdən çoxdur

0
27

Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat (DOST) Agentliyinin ilk “DOST” mərkəzinin xidmətlərindən artıq 22 mindən çox vətəndaş faydalanıb.

Nazirliyin İctimaiyyətlə əlaqələr və kommunikasiya şöbəsindən verilən məlumata görə, vətəndaşların müraciətlərinə uyğun olaraq, məşğulluq, pensiya, sosial müavinət və təqaüdlər, sosial xidmətlər, əlillik, tibbi-sosial ekspertiza və reabilitasiya, sosial sığorta, əmək münasibətləri, həmçinin sosial-hüquqi, sosial-məişət xidmətləri, sosial-pedaqoji və s. sahələr üzrə xidmətlər göstərilib.

Xidmətlərin göstərilməsi prosesi vətəndaş məmnunluğu prinsipinə uyğun qurulub. Mərkəzə gələn vətəndaşa xidmətdən yararlandıqdan sonra masadan ayrılmadan xidmətdən nə dərəcədə razı qalıb-qalmadığı barədə rəyini bildirmək təklif edilir və o, öz rəyini elektron sistemə daxil edir. Bundan başqa, mərkəzin çıxışında da könüllülər vətəndaşlara yaxınlaşaraq sorğuda iştirak etməyi təklif edirlər. “Göstərilən xidmətdən nə dərəcədə razı qaldınız?” sualına “Razı qaldım”, “Qismən razı qaldım”, “Razı qalmadım” və “Bilmirəm” cavab variantları təklif olunur.

Vətəndaşların məmnunluq səviyyəsi mərkəzin Təhlil və statistika departamenti tərəfindən həmin cavablara və Çağrı mərkəzinin məlumatlarına əsasən hesablanır. İndiyə qədər olan məlumata əsasən, vətəndaşların “DOST” mərkəzindən tam məmnunluq səviyyəsi 93 faizi keçib, xidmətlərdən qismən məmnun vətəndaşlar isə 4 faiz təşkil edir.