Kloppa “sillə” kimi cavab

0
100

Məşhur karikatura ustası Omar Momani  Yurgen Kloppun Bakıda Avropa Liqası finalı əleyhinə səsləndirdiyi fikirlərə münasibət bildirib.

Momani karikaturanı paylaşaraq üzərinə “Bizə qoşul, cənab Klopp. Azərbaycanda səhər yeməyi insanları bir araya gətirir və hər kəsi xoşbəxt edir. Bunu etmək lazımdı” şərhini yazıb. 

Onun bu karikaturası böyük dəstək görüb. Karikaturada “Çelsi”nin baş məşqçisi Mauritsio Sarri, futbolçuları Nqolo Kante, Eden Azar, “Arsenal”ın futbolçuları Pyer-Emenike Obameyanq, Mesut Özil və Aleksandr Lyakazet yer alıb. 

Qeyd edək ki, “Liverpul”un baş məşqçisi Yurgen Klopp Avropa Liqasının final matçının Bakıda keçirilməsinə münasibət bildirib.

Almaniyalı mütəxəssis UEFA-nın qərarının gülməli olduğunu bildirib: “Finalın Bakıda keçirilməsi gülməlidir. Bilmirəm, bu qərarı verənlər səhər nə yeyirlər. Ötən il biz Kiyevə getmişdik. Bəli, ora gözəl şəhərdir. Ancaq Rusiyanın və ya dünyanın bu hissəsindən çətin ki, hansısa komanda finala çıxsın. Məsuliyyətsiz qərardır”.


Azarkeşlərin Bakıya səfərinin çətin olacağını bildirən Klopp Çempionlar Liqasının finalının Madridə salınması barədə də danışıb: “Bakıya necə getmək olar? Mütəmadi reyslərin olması barədə anlayışım yoxdur. Belə qərarlar daha şüurlu verilməlidir. Eşitmişəm ki, Madriddə adətən 100 funt-sterlinqə götürə bildiyiniz mənzil üçün indi 2700 funt-sterlinq ödəməlisiz. Bu, ağlasığmazdır. Nə deyə bilərəm? Azarkeşlər üçün çox təəssüflənirəm”.

Xatırladaq ki, Kloppun çalışdırdığı “Liverpul” ÇL-in finalında “Tottenhem”lə qarşılaşacaq. Avroliqanın finalı isə mayın 29-da Bakı Olimpiya stadionunda “Çelsi” və “Arsenal” arasında keçiriləcək.