“Heç bir terror aktı İranı yolundan döndərə bilməz”

0
27

İranda törədilən terror aktına görə məsuliyyəti ABŞ-ın dəstəklədiyi dövlətlər daşıyır.

Bunu İranın Ali Lideri Ayətullah Seyid Əli Xamneyi deyib. O, terror aktı zamanı həlak olanların ailələrinə başsağlığı verərək bildirib ki, terrorun məqsədi xalqı qorxudub azadlıq və istiqlaliyyət yolundan döndərməkdir. Lakin düşmənlər İranda vəziyyəti gərginləşdirə bilməyəcəklər. İran xalqı azadlığını və istiqlaliyyətini qorumaq uğrunda mübarizəsini daim davam etdirəcək.

Ali Lider ölkənin kəşfiyyat orqanlarına xüsusi tapşırıq verərək terror aktını törədənlərin tez bir zamanda tutulub məsuliyyətə cəlb olunmalarını tələb edib.

İran prezidenti Həsən Ruhani televiziya müraciətində bildirib ki, ABŞ və onun müttəfiqlərinin təzyiqlərinə baxmayaraq, rəsmi Tehran nüvə proqramını davam etdirəcək. Heç bir terror aktı İranı yolundan döndərə bilməz.

İranın xarici işlər naziri Məhəmməd Cavad Zərif isə qeyd edib ki, terror nəticəsində ölənlər arasında uşaqlar, qadınlar və jurnalistlər də var. Nazir məsuliyyəti ABŞ-ın üzərinə qoyaraq bildirib ki, İran öz vətəndaşlarını qoruyacaq və bu terror aktına qısa zamanda kəskin cavab veriləcək.

Xatırladaq ki, İranda “Müqəddəs müdafiə” həftəsi ilə əlaqədar hər il sentyabrın 22-də böyük şəhərlərdə hərbi parad keçirilir. Dünən Əhvaz şəhərində keçirilən parad zamanı törədilən terror aktı nəticəsində azı 25 nəfər həlak olub, 60-dan çox insan yaralanıb.

Qeyd edək ki,baş vermiş bu hadisə ilə bağlı Prezident İlham Əliyev də İran İslam Respublikasının Prezidenti Həsən Ruhaniyə başsağlığı verib: Hörmətli cənab Prezident,

Ölkənizdə törədilmiş terror aktı nəticəsində insanların həlak olması və yaralanması xəbəri bizi olduqca kədərləndirdi.

Biz bu dəhşətli hadisədən son dərəcə hiddətlənir, terrorizmi pisləyir, onun bütün forma və təzahürlərinə qarşı qətiyyətlə mübarizə aparılmasını vacib hesab edirik.

Baş vermiş bu faciə ilə əlaqədar Sizə, həlak olanların ailələrinə və yaxınlarına, bütün İran xalqına öz adımdan və Azərbaycan xalqı adından dərin hüznlə başsağlığı verir, yaralananlara və xəsarət alanlara şəfa diləyirəm.

Allah rəhmət eləsin!

 

İlham Əliyev

Azərbaycan Respublikasının Prezidenti

Bakı şəhəri, 22 sentyabr 2018-ci il.