“Qarabağ” tilsimlənmiş raundu keçməyə iddialıdır

0
231

Sabah Çempionlar Liqasında III təsnifat mərhələsinin cavab oyunlarına start veriləcək. alpaninfo.com apasport.aza əsasən məlumat verir ki, Azərbaycan çempionu “Qarabağ” növbəti avrokubok sınağına çıxacaq.

 

Ağdam təmsilçisi Moldovada bu ölkənin ən titullu klubu “Şerif”in qonağı olacaq. Bakıda rəqibini məğlub edə bilməyən (0:0) Qurban Qurbanovun yetirmələrini səfərdə qollu heç-heçə də qane edir.

 

Mərhələ keçmək, bunu oyunu penaltilər seriyasına daşımadan gerçəkləşdirmək üçün “Qarabağ” mütləq qol vurmalıdı. Cari mövsüm keçirdiyi 3 oyunda 6 qol vuran təmsilçimizin məhsuldarlığı Tiraspolda uğura ümid etməyə əsas verir.

 

Ardıcıl 4-cü dəfə Çempionlar Liqasının III təsnifat mərhələsinə yüksələn ağdamlılar tilsimlənmiş raundu keçməyə iddialıdı. Əvvəlki üç mövsümdə “Zalsburq”, “Seltik” və “Viktoriya” sədlərinə ilişdikdən sonra mübarizəni Avropa Liqasında davam etdirən “Qarabağ” bu xoşagəlməz tendensiyanı qırmalıdı.

 

Düzdü, son üç ildə daha aşağı səviyyəli turnirə “göndərilən” çempionumuz pley-offu adlamağı bacarıb. Bu da qrupda oynamaq imkanı verib. Lakin ağdamlılar tarix yazmaq şansından yararlanmaq niyyətindədi. İndiyədək heç bir Azərbaycan klubu qitənin ən nüfuzlu klub turnirinin pley-offunda oynamayıb. 3 imkanı qaçıran “Qarabağ”la yanaşı, “Bakı” və “Neftçi”nin də bu raundun astanasında dayandığını nəzərə alsaq, klublarımızın 5 cəhdi uğursuz alınıb.

 

Tiraspolda uğur qazanmaqla bu turnirin pley-offuna yüksələcək “Qarabağ” qrup mərhələsinə vəsiqəni təmin edəcək. Çünki növbəti raundda məğlubiyyət Avropa Liqasının, qələbə isə Çempionlar Liqasının əsas mərhələsinə vəsiqə verir. “Şerif” səddi keçilməsə, “Qarabağ” yenidən Avropa Liqasının pley-offunda oynamalı olacaq.

 

Qeyd edək ki, Tiraspolun “Şerif” stadionunda keçiriləcək qarşılaşma Bakı vaxtı ilə saat 21:00-da başlayacaq.

 

Çempionlar Liqası

III təsnifat mərhələsi, cavab oyunu

1 avqust

21:00. “Şerif” (Moldova) – “Qarabağ” (Azərbaycan)

Baş hakim: Roy Reynşreyber

Baş hakimin köməkçiləri: Amihay Yehoşua Mozes, Dan Uçeniç

Dördüncü hakim: Daniel Bar Natan (hamısı İsrail)
UEFA nümayəndəsi: Edqars Pukinsks (Latviya)

Hakim-inspektor: Paulius Malzinskas (Litva)

Tiraspol. “Şerif” stadionu

İlk oyun – 0:0